“Կովկաս” պարային համույթը հիմնադրվել
է 1977թ. Երևանի մանկապատանեկան քաղաքային կենտրոնում` պիոներ պալատ: Հիմնադիրը Աշոտ Հակոբյանն էր: Այսօր գեղարվեստական ղեկավարն ու գլխավոր բալետմեստրը նրա ավագ որդին` Արմեն Հակոբյանն է: “Կովկաս”
պարային համույթի ծրագրում տեղ են գտել հայկական, ռուսական, վրացական և աշխարհի տարբեր ժողովուրդների ազգային պարեր: Իր տարիների գործունեության ընթացքում, Աշոտ Հակոբյանի և Արմեն Հակոբյանի շնորհիվ
համույթը ստեղծել է իր ոճը, ձեռք բերել մեծ հաջողություններ, բազմիցս մասնակցել համամիութենական, անդրկովկասյան և միջազգային փառատոնների, պարգևատրվել պատվոգրերով, դիպլոմներով, հուշամեդալներով և գավաթներով:
Համույթի սաներից շատերը հաջողությամբ աշխատում են պրոֆեսիոնալ խմբերում: “Կովկաս”-ն իր ուրույն տեղն ունի մանկապատանեկան ստեղծագործության կենտրոնում:
Համույթը բարեգործական համերգներով հանդես է եկել աղետի գոտում, մանկատներում, ծերանոցներում և զորամասերում` անմոռաց պահեր պարգևելով հանդիսատեսին: “Կովկաս” պարային համույթը դարձել է “Հայաստանի մանուկներ”, “Դեբյուտ 95”, “Իմ անկախ պետությունը 5 տարեկան է” փառատոնների դափնեկիր:
Համույթն արժանացել է հանդիսատեսի ջերմ ծափահարություններին Հայաստանում, Խորհրդային նախկին հանրապետություններում և արտասահմանում:
Համույթն իր կենսագործունեության տարիների ընթացքում անցել է
ստեղծագործական ինքնահաստատման ուղի, տարեցտարի բարձրացել է համույթի անդամների կատարողական վարպետությունը, որն արտահայտվում է ազգային ժողովրդական
պարերի կատարման գեղեցկությամբ: Նուրբ ու կերպարային բնույթով են ներկայացվում պարային բազմաժանր կատարումները, որոնք յուրօրինակ թարմություն են հաղորդում համույթի համերգներին:
